Vilja hífa gesti með krana í 45 m hæð

Hópur sem Jóhannes Stefánsson veitingamaður, kenndur við Múlakaffi, og Jón Axel Ólafsson, útgefandi hjá Eddu, eru hluti af hefur uppi áform um að opna háloftaveitingastað á Klambratúni í sumar.

Hefur hópurinn tryggt sér leyfi til þess að opna staðinn, sem þekktur er undir vörumerkinu Dinner in the Sky og á rætur að rekja til Belgíu.

Í umfjöllun um mál þetta í Morgunblaðinu í dag segir Jón Axel verkefnið vera í ferli í borgarkerfinu þar sem tilheyrandi leyfi þurfa að fást áður en hægt er að hefja rekstur. Sambærilegir staðir eru í 53 borgum um allan heim. Gestir eru festir með beltum og hífðir upp í allt að 45 metra hæð.