Veðurfræðingur Vegagerðarinnar segir að hríðinni sloti á fjallvegum suðvestanlands um klukkan 20 í kvöld, á hann þar meðal annars við veginn um Hellisheiði og Þrengslin. Þá verður veginum um Hvalnesskriður lokað í kvöld.
Fram kemur í tilkynningu Vegagerðarinnar að undir Hafnarfjalli verði vindhviður 30-40 m/s fram á kvöld. Þá verður einnig mjög hvasst á Kjalarnesi. Reiknað er með snjókomu og síðar slyddu suðaustanlands austur á Austfirði. Þar eru horfur á talsverðri ofanhríð til fjalla allt til morguns.
Vegurinn um Hvalnes- og Þvottáskriður verður lokað í kvöld, mánudag, klukkan 22 vegna snjóflóða- og skriðuhættu. Lokað verður í nótt og skoðað með opnun í fyrramálið.
Mikill skafrenningur er á Sandskeiði og Hellisheiði og þar er þæfingsfærð. Hálkublettir eru í Þrengslum. Þungfært og skafrenningur er á Mosfellsheiði og Lyngdalsheiði. Annars er hálka, hálkublettir eða snjóþekja á flestum vegum á Suðurlandi, þó síst á hringveginum.
Óveður er á Reykjanesbraut og Kjalarnesi en vegur er hálkulaus.
Hálka eða hálkublettir eru víða á Vesturlandi. Lokað á Fróðárheiði.
Á Vestfjörðum er hálka eða hálkublettir á flestum leiðum og eitthvað um snjóþekju. Ófært er á Hálfdáni en þungfært og stórhríð á Kleifaheiði og þæfingsfærð og stórhríð á Mikladal.
Á Norðurlandi vestra eru hálkublettir. Meiri hálka er hins vegar á Norðurlandi eystra.
Nokkur hálka eða hálkublettir eru á vegum á Austurlandi, suður undir Höfn.
Á Suðausturlandi er autt frá Höfn að Öræfum en þaðan er snjóþekja og éljagangur að Vík en hálkublettir og éljagangur vestur fyrir Vík.