Einstaklingur hefur verið fluttur á slysadeild Landspítalans eftir að hafa fallið af svölum á þriðju hæð í fjölbýlishúsi í Seljahverfi í Breiðholti. Tilkynningin barst Neyðarlínu skömmu fyrir klukkan 23 í kvöld.
Lögreglumenn og sjúkraflutningamenn slökkviliðsins á höfuðborgarsvæðinu mættu skömmu síðar á vettvang. Ekki er vitað um líðan þess sem fluttur var á sjúkrahús en samkvæmt heimildum mbl.is var hann með meðvitund í sjúkrabílnum.
Frekari upplýsingar um atvikið er ekki að fá á þessari stundu en lögreglan fer með rannsókn málsins.