„Það hafa verið þreifingar í gangi og menn settust niður í gær en það leiddi ekki til þess að menn fyndu lausn,“ segir Gylfi Ingvarsson, talsmaður starfsmanna álversins.
Kjaradeila starfsmanna álvers Rio Tinto Alcan í Straumsvík og vinnuveitenda stendur enn í stað og lausn virðist ekki í sjónmáli.
Í umfjöllun um deiluna í Morgunblaðinu í dag staðfestir Ólafur Teitur Guðnason, upplýsingafulltrúi Rio Tinto Alcan, einnig að talað hafi verið saman „á göngunum“. Hann segir álverið slaki ekki á kröfum sínum um auknar heimildir til verktöku. „Við viljum sitja við sama borð og allir aðrir.“