Kínverskur ferðamaður var dæmdur í þriggja mánaða skilorðsbundið fangelsi fyrir manndráp af gáleysi í Héraðsdómi Suðurlands í morgun. RÚV segir frá þessu. Hann ók bíl sem lenti í hörðum árekstri við annan á einbreiðri brú í Öræfum á öðrum degi jóla. Ökumaður hins bílsins lést í árekstrinum.
Héraðsdómur Suðurlands kvað upp dóm í máli mannsins í morgun en hann játaði sök. Hann var sakaður um að hafa ekið bíl sínum of hratt miðað við aðstæður. Slysið varð við brúna yfir Hólá í Öræfum. Ökumaður hins bílsins var einnig útlendingur.
Ferðamaðurinn var einnig dæmdur til að greiða 4,8 milljónir króna í sakarkostnað og var sviptur ökuréttindum í tíu mánuði samkvæmt frétt RÚV. Hann hafði verið í farbanni undanfarna mánuði.
Fyrri frétt mbl.is: Ákærður fyrir manndráp af gáleysi