Veðurhorfur næsta sólarhringinn gera ráð fyrir austlægri átt á landinu, 5-10 metrum á sekúndu, en síðan suðaustanátt 8-15 m/s með morgninum og rigningu. Hvassast verður við suður- og suðvesturströndina. Hægari átt og úrkomulítið verður um landið norðaustanvert fram eftir degi.
Það mun síðan draga úr vindi í kvöld. Fremur hæg suðlæg átt verður á landinu í nótt og í fyrramálið og víða dálítil væta, en síðan úrkomulítið. Vaxandi norðaustan átt og él á Vestfjörðum annað kvöld. Hiti 3 til 10 stig að deginum.
Fram kemur í hugleiðingum veðurfræðings á vefsíðu Veðurstofunnar að skil gangi norðaustur yfir landið í dag með stífri suðaustan átt og rigningu eða súld. Á morgun verði hæg suðlæg átt á landinu og áfram milt veður.
Skúrir verði á víð og dreif á morgun, einkum fyrripart dags. Á fimmtudag og föstudag verði fremur vætusamt og kólnandi veður og búast megi því við slyddu eða rigningu víða um land og síðar einnig snjókomu fyrir norðan.