Dega fjölskyldunni frá Albaníu, var í dag tilkynnt að fyrri ákvörðun standi um að vísa þeim úr landi. „Maður óttaðist náttúrulega að þetta myndi gerast,“ segir séra Þórhallur Heimisson, sem hefur aðstoða fjölskylduna við að reyna að fá hæli hér á landi.
Fjölskyldan hefur ekki fengið uppgefið hvenær henni verður gert að yfirgefa landið, en þau flúðu frá Albaníu á síðasta ári sökum ofsókna vegna stjórnmálaskoðana og vegna lélegrar geðheilbrigðisþjónustu fyrir elsta soninn sem glímir við geðklofa.
Þeim var synjað um hæli þann 14. október í fyrra og var sú ákvörðun staðfest af kærunefnd útlendingamála stuttu eftir áramót.
„Við höfum ekki fengið upp gefið af hverju ákvörðunin stendur, þannig að ég er ekkert búinn að gefa þetta upp á bátinn. En þetta er niðurstaða dagsins,“ segir Þórhallur sem hefur ásamt fleiri stuðningsmönnum fjölskyldunnar unnið að því að þau uppfylli skilyrði fyrir að fá dvalarleyfi. Hafa hjónin m.a. bæði fengið tilboð um vinnu fái þau að vera hér áfram.
Hann segir fjölskylduna vissulega vera vonsvikna. „Þau eru orðin óskaplega þreytt.. Þetta er búið að taka langan tíma og hefur neikvæð áhrif á alla fjölskylduna. Þau eru örvæntingafull því þau hafa ekki að neinu að snúa og aðstæður fyrir þau í Albaníu eru slæmar bæði félagslega og vegna stjórnmálaskoðana föðurins.“