Rannsókn lögreglunnar á höfuðborgarsvæðinu á átökunum í Breiðholti á föstudagskvöld er í fullum gangi að sögn Friðriks Smára Björgvinssonar, yfirmanns rannsóknardeildar. Maðurinn sem lögregla hefur leitað að frá því aðfaranótt laugardags gengur enn laus. Lögregla veit deili á manninum og er allt kapp lagt á að ná honum.
Uppfærð frétt: Maðurinn fundinn
Tilkynnt var um tvo skothvelli sem bárust frá hópnum á föstudagskvöld. Til vopnaðra slagsmála kom á milli 40 til 50 manns fyrir utan söluturninn í Iðufelli. Friðrik Smári sagði í samtali við mbl.is í gær að almenningi stafaði ekki hætta af manninum og svo virtist sem átökin tengdust uppgjöri á milli tveggja hópa.
Maður sem var handtekinn aðfaranótt laugardags var í gær úrskurðaður í gæsluvarðhald á grundvelli rannsóknarhagsmuna. Konu sem var einnig handtekin í tengslum við rannsóknina var sleppt.