Innlent | mbl | 9.9.2016 | 7:45

Hæstiréttur tekur Kaupþingsmál fyrir

Hæstiréttur íslands. mbl.is/Þórður

Mál níu fyrrverandi stjórnenda og starfsmanna Kaupþings verður tekið fyrir í Hæstarétti í dag. Sjö þeirra hlutu dóma fyrir markaðsmisnotkun og umboðssvik en þeim var gefið að sök að hafa haldið uppi hlutabréfaverði bankans með ólögmætum hætti í umfangsmesta markaðsmisnotkunarmáli Íslandssögunnar.

Málflutningur í málinu hefst kl. 8 og stendur fram yfir hádegi ef saksóknari og verjendur fullnýta þann tíma sem þeir hafa til að flytja mál sitt.

Þeir sem ákærðir voru í málinu voru Hreiðar Már Sigurðsson, fyrrverandi forstjóri bankans, Sigurður Einarsson, fyrrverandi stjórnarformaður bankans, Magnús Guðmundsson, fyrrverandi forstjóri Kaupþings í Lúxemborg, Ingólfur Helgason, fyrrverandi forstjóri Kaupþings á Íslandi, Einar Pálmi Sigmundsson, fyrrverandi forstöðumaður eigin viðskipta Kaupþings, Birnir Sær Björnsson og Pétur Kristinn Guðmarsson, starfsmenn eigin viðskipta, Bjarki Diego, fyrrverandi framkvæmdastjóri útlána Kaupþings og Björk Þórarinsdóttir, fyrrverandi lánafulltrúi í lánanefnd bankans.

Ingólfur var dæmdur í fjögurra ára og sex mánaða fangelsi og Bjarki fékk tveggja ára og sex mánaða fangelsisdóm. Hreiðar og Sigurður voru sakfelldir í málinu og bættist eins árs fangelsi við dóm Sigurðar sem hann hafði hlotið í al-Thani-málinu. Hreiðari var ekki gerð frekari refsing en hann hafði hlotið í sama máli.

Birnir Sær og Pétur voru dæmdir í átján mánaða skilorðsbundið fangelsi og Einar fékk tveggja ára skilorðsbundinn fangelsisdóm.

Björk var sýknuð af ákæru um umboðssvik í héraði. Nokkrum ákæruliðum gegn Magnúsi var vísað frá en hann sýknaður í öðrum liðum.