„Ég hef áhyggjur af því að dýraníð viðgangist og að við séum ekki að ná utan um þetta vandamál,“ sagði Brynhildur Pétursdóttir, þingmaður Bjartrar framtíðar í umræðum um störf þingsins á Alþingi í dag.
Ástæður orða Brynhildur eru fréttir frá því í gær um dýraníð í Hörgárdal í síðasta mánuði er lambi var misþyrmt hrottalega við smalamennsku aðra helgina í september.
„Í þetta skiptið þarf vitni að gefa sig fram og lögregla að rannsaka málið,“ sagði Brynhildur og velti því fyrir sér hverju það skilaði að úthúða gerandanum á samfélagsmiðlum. „Það þarf að ná í viðkomandi og bjóða honum aðstoð.“
Sjónarvottar sögðu að lambið hefði of örmagna til að komast yfir hringveginn skammt frá Þelamörk. Þar tók einn smalinn lambið upp, kastaði því frá sér og gekk síðan í skrokk á því; sparkaði í það og stappaði á hálsi þess.
„Ég fæ sting í magann þegar ég les svona fréttir en því miður eru þær of algengar og þetta er mjög alvarlegt vandamál. Ég ætla rétt að vona að lögregla og héraðsdýralæknir séu að rannsaka málið. Þetta er grafalvarlegt.“
Fréttir mbl.is:
Grunur um dýraníð í Hörgársveit