„Ég má tala“ og „Ég á rétt á pizzu“ var á meðal krafna sem börn í 2. bekk á frístundaheimilum í Hlíðum, miðborginni og Vesturbæ settu fram á kröfuspjöldum í réttindagöngu í miðborginni í dag. Tilgangurinn var að minna á réttindi barna og Barnasáttmála Sameinuðu þjóðanna.
Gangan lagði af stað frá Hallgrímskirkju kl. 15 og lagði hún leið sína niður í Þjóðleikhús, þar sem Guðni Th. Jóhannesson forseti Íslands ávarpaði börnin og setti hátíðardagskrá. Þá talaði Dagur B. Eggertsson borgarstjóri við börnin eftir að þau nutu leiklistar og söngs.
Í tilkynningu frá Reykjavíkurborg kemur fram að réttindaganga barna sé farin árlega í tilefni af barnaréttindaviku allra frístundaheimila í Hlíðum, miðborginni og Vesturbæ. Hún sé hápunktur réttindaviku þar sem lögð sé áhersla á fræðslu um réttindi barna, Barnasáttmálann, lýðræðisleg vinnubrögð og að kenna börnunum að þekkja mun á réttindum og forréttindum.