Tilkynnt var um eld hjá fyrirtækinu Hringrás á Klettagörðum í kvöld. Í tilkynningu frá slökkviliði höfuðborgarsvæðisins kemur fram að eldur hafi komið upp í safnhaug og að liðsmenn frá öllum stöðvum hafi verið kallaðir á staðinn.
Hringrás er leiðandi í endurvinnslu brotajárns og móttöku spilliefna á Íslandi.
Að sögn slökkviliðsins er eldurinn ekki mikill og telja slökkviliðsmenn sig vera að ná tökum á honum.
Eldurinn kviknaði í blönduðum safnhaug.
Uppfært kl. 23:00
Að sögn slökkviliðsins er búið að hólfa hauginn mikið niður frá fyrri eldum sem þarna hafa kviknað og því varð eldurinn minni en áður.
Starfsfólk frá Hringrás er komið á staðinn og er að moka haugnum til. Slökkvilið slekkur í jafnóðum.
Lítill reykur hefur komið út frá eldinum og engin hætta er á ferðum. Engu að síður mun taka einhvern tíma að ráða niðurlögum eldsins.
Frétt mbl.is: Hringrás verði flutt annað
Uppfært kl. 23:15
Slökkviliðið telur að um 10 til 15 mínútur séu eftir af slökkvistarfinu.
Uppfært kl. 23:30
Búið er að slökkva sjáanlegan eld. Vakt verður á staðnum til miðnættis.