Kona á fertugsaldri er í haldi lögreglu grunuð um íkveikju í fjölbýlishúsi við Hafnargötuna í Reykjanesbæ í nótt. Fyrrverandi kærasti konunnar er íbúi í húsinu og virðist meint íkveikja konunnar beinast gegn honum.
Lögreglan fullyrðir að ekki sé um hatursglæp að ræða sem beinist gegn öllum íbúum hússins. Heldur sé athæfið bundið við deilur milli þessara tveggja einstaklinga. Um 30 manns búa í húsinu og er hluti íbúa fjölskyldur úr hópi hælisleitenda sem dvelja í húsinu á vegum Reykjanesbæjar.
Málið er í rannsókn og gengur vel, að sögn lögreglu. Lögreglurannsóknin beindist fljótlega að konunni.
Í fyrramálið verður tekin ákvörðun um gæsluvarðhald.
Frétt mbl.is: 8 á sjúkrahús eftir bruna í Reykjanesbæ