Vill að lögræðislögum verði breytt

Í fyrsta ávarpi Þórhildar Sunnu Ævarsdóttur Pírata á Alþingi hvatti hún þingmenn til þess að breyta lögræðislögum, þar sem nauðungarvistun einstaklings er heimiluð vegna geðsjúkdóms og einnig þvingaðar fóstureyðingar. 

Þórhildur Sunna benti á að í 19. grein laganna kemur fram að heimila megi frelsissviptingu, eða svokallaða nauðungarvistun einstaklings, á þeim grunni að hann sé „haldinn alvarlegum geðsjúkdómi eða verulegar líkur eru taldar á að svo sé eða ástand hans er þannig að jafna megi til alvarlegs geðsjúkdóms“.

Hún sagði að ekki sé að finna í lögræðislögunum önnur skilyrði til slíkrar frelsissviptingar. „Því verð ég að taka undir ítrekaðar ávirðingar Evrópunefndar um varnir gegn pyndingum sem bent hefur á að ákvæðið feli í sér lagalega mismunun gagnvart fólki með geðsjúkdóma,“ sagði Þórhildur.

„Annað alvarlegt dæmi um slíka mismunun er að finna í lögum um fóstureyðingar sem gera lögráðamanni lögræðissviptrar konu kleift að neyða hana í fóstureyðingu. Þvingaðar fóstureyðingar hafa verið skilgreindar sem form pyndinga af sérlegum sendiherra Sameinuðu þjóðanna gegn pyndingum.“

Hún sagði lögin hvorki standast stjórnarskrá né samning Sameinuðu þjóðanna um réttindi fatlaðs fólks.

• Blogga um frétt