Lögreglunni hefur ekki orðið ágengt í rannsókn sinni á árásinni sem framin var í Greiningar- og ráðgjafarstöð ríkisins í Kópavogi 19. desember.
„Engar vísbendingar hafa borist sem leitt hafa til þess að einhver sé grunaður í málinu,“ segir Grímur Grímsson, yfirlögregluþjónn í rannsóknardeild lögreglunnar á höfuðborgarsvæðinu.
Bætir hann við að verið sé að rannsaka hvort lífsýni finnist á grímunni og hnífnum.
Maðurinn sem lögreglan leitar að vegna árásarinnar er talinn vera á bilinu 20 til 25 ára. Skildi hann eftir hnífinn og svokallaða Scream-grímu, sem er þekkt úr samnefndum hryllingsmyndum.
Árásin átti sér stað í stigagangi hússins, á milli jarðhæðar og annarrar hæðar. Var konan, sem er starfsmaður við stöðina, á leiðinni upp en árásarmaðurinn á leið niður.
Konan fékk skurð á handlegg þannig að blæddi úr.
Frétt mbl.is: Með Scream-grímu er hann stakk konuna