Vonir eru um að eitthvað geti skýrst varðandi ferðir rauða Kia Rio-bílsins laugardagsmorguninn 14. janúar, daginn sem Birna Brjánsdóttir hvarf. Enn vantar upplýsingar um ferðir bifreiðarinnar á milli 7 og 11.
Grímur Grímsson, yfirlögregluþjónn og stjórnandi rannsóknar á hvarfi Birnu, segir að ákveðin von sé um að hægt verði að ná upplýsingum um ferðir bílsins á þessum tíma án þess að geta farið nánar út í hvað það er. Lögreglan hefur einkum reitt sig á upplýsingar úr eftirlitsmyndavélum og símagögn varðandi ferðir bílsins og eins hafa einhverjar upplýsingar komið frá almenningi.
Grímur segir að áherslan sé lögð á það núna að koma leit dagsins í gang en um 500 björgunarsveitarmenn taka þátt í leitinni í dag. „Við erum vongóð áfram,“ segir Grímur en það voru viss vonbrigði að leitin skyldi ekki skila árangri í gær.
Að sögn Gríms er lögreglan enn að fara yfir þau gögn sem hún hefur undir höndum, það er bæði myndbandsupptökur og farsímagögn tvímenninganna sem sitja í gæsluvarðhaldi á Litla-Hrauni. Þeir hafa ekki verið yfirheyrðir um helgina en stefnt er að því að yfirheyra þá á morgun.
Alls voru þrír skipverjar Polar Nanoq úrskurðaðir í gæsluvarðhald í síðustu viku. Tveir í tveggja vikna gæsluvarðhald vegna hvarfs Birnu og einn var úrskurðaður í gæsluvarðahald til mánudagskvölds en sá úrskurður byggði á fíkniefnafundi um borð í togaranum. Grímur segir að sá skipverji sé laus úr gæsluvarðhaldi en lögreglan á höfuðborgarsvæðinu bíður enn niðurstöðu Hæstaréttar um hvort tvímenningarnir verði úrskurðaðir í fjögurra vikna gæsluvarðhald líkt og farið var fram á. Dómari við Héraðsdóm Reykjaness féllst ekki á beiðni lögreglunnar og úrskurðaði þá í tveggja vikna gæsluvarðhald.
Að sögn Gríms eru málin rannsökuð hlið við hlið þrátt fyrir að vera hvort sitt málið en þau eru bæði innan vébanda miðlægrar rannsóknardeildar lögreglunnar á höfuðborgarsvæðinu.
Ökumaður hvíta bílsins sem lögreglan hefur beðið um að hafa samband er enn ófundinn, hafa margar ábendingar borist um hver hann geti verið en þær hafa ekki skilað tilætluðum árangri.