Héraðsdómari við Héraðsdóm Reykjavíkur féllst ekki á frávísunarkröfu í einum hluta ákærunnar í máli sem héraðssaksóknari höfðaði gegn Hlín Einarsdóttur og Malín Brand. Var um að ræða þann hluta sem byggðist á kæru fyrrverandi samstarfsmanns Hlínar, en í ákæru málsins segir að hún hafi í félagi við systur sína haft af manninum 700 þúsund krónur með hótunum um að leggja annars fram kæru til lögreglu um að hann hefði nauðgað sér.
Í ákærunni kemur fram að Malín hafi rætt við manninn nokkrum sinnum í apríl og hann hafi svo afhent Malín fjármunina 10. og 13. apríl. Fer maðurinn fram á 1,7 milljónir í skaðabætur vegna málsins.
Í gær var munnlegur málflutningur um frávísunarkröfuna, en þinghald var lokað. Sem fyrr segir féllst dómari ekki á að vísa þessum hluta málsins frá.
Hlín og Malín eru einnig ákærðar fyrir fjárkúgun gegn fyrrverandi forsætisráðherra Íslands, en ekki var tekist á um þann hluta ákærunnar núna.
Aðalmeðferð í máli systranna fer fram 21. mars.