Þingfesting í máli ákæruvaldsins gegn Thomas Møller Olsen, sem grunaður er um að hafa banað Birnu Brjánsdóttur, fer fram í Héraðsdómi Reykjaness á morgun.
Í ákærunni sem hefur verið birt fjölmiðlum kemur fram að Olsen hafi veist að Birnu með ofbeldi. Er hann sagður hafa slegið hana ítrekað í andlit og höfuð, „tekið hana kverkataki og hert kröftuglega að hálsi hennar.“
Atburðurinn á að hafa átt sér stað annaðhvort þegar rauðu Kia Rio-bifreiðinni var lagt í nágrenni flotkvíarinnar við Hafnarfjarðarhöfn, eða á öðrum óþekktum stað.
Að því loknu á Olsen að hafa varpað Birnu í sjó eða vatn þar sem hún drukknaði.
Lík Birnu fannst í fjörunni neðan við Selvogsvita 22. janúar eftir umfangsmikla leit björgunarsveita og hafði hennar þá verið saknað í rúma viku.
Olsen er einnig ákærður fyrir stórfellt fíkniefnalagabrot, en hann á að hafa reynt að smygla rúmlega 23 kg af kannabisefnum, sem hann hafði komið fyrir í káetu sinni um borð í grænlenska togaranum Polar Nanoq.
Í ákærunni er einnig lögð fram einkaréttarkrafa af hendi foreldra Birnu og hljómar hún upp á 10,5 milljónir kr. í miskabætur fyrir hvort þeirra.