Aðlögunaráætlun samþykkt

Reykjanesbær.
Reykjanesbær. mbl.is/Þorvaldur Örn Kristmundsson

Aðlögunaráætlun Reykjanesbæjar fyrir árin 2017 – 2022 var samþykkt á bæjarstjórnarfundi síðdegis í dag en samkvæmt henni mun lögbundið skuldaviðmið nást á þeim tíma, en slíkt er nauðsynlegt samkvæmt lögum.

Núverandi meirihluti Reykjanesbæjar, sem tók við stjórn bæjarins árið 2014, hefur unnið að fjárhagslegri endurskipulagningu sveitarfélagsins frá þeim tíma, en eftirlitsnefnd með fjármálum sveitarfélaga hafði krafið bæinn um aðlögunaráætlun til að uppfylla skilyrði laga um skuldaviðmið, að því er kemur fram í tilkynningu frá Reykjanesbæ.

„Aðlögunaráætlunin byggir á þeirri framtíðarsýn að í Reykjanesbæ ríki áfram mikill kraftur og uppbygging með tilheyrandi fólksfjölgun, fyrsta flokks þjónustu og auknum lífsgæðum. Til að ná markmiðinu þurftum við að lækka skuldir og auka tekjur með aðgerðaráætlun okkar, sem fékk nafnið Sóknin og kynnt var í október 2014,“ segir Kjartan Már Kjartansson, bæjarstjóri Reykjanesbæjar, í tilkynningunni.

„Við settum okkur fjögur markmið. Að reka bæinn okkar með afgangi til lengri tíma en ekki halla eins og verið hefur um árabil. Að hafa hemil á fjárfestingum. Að gera B-hluta stofnanir sjálfbærar og stöðva streymi fjármagns úr grunnþjónustu bæjarins. Og loks að endurskipuleggja efnahaginn með lækkun skulda. Þetta hefur tekist og því ber að fagna,“ segir hann.

Guðbrandur Einarsson, forseti bæjarstjórnar Reykjanesbæjar, segir í tilkynningunni að Reykjanesbær hafi verið langt yfir 150% skuldaviðmiði þegar ný bæjarstjórn hafi tekið við árið 2014 og bærinn hafi verið í einni erfiðustu stöðu sveitarfélaga á landinu. 

„Skuldirnar voru að mestu leyti til komnar vegna ýmissa verkefna, fjárfestinga og skuldbindinga, ekki síst vegna leiguskuldbindinga Eignarhaldsfélagsins Fasteign ehf. Erfiðasta verkefnið var í raun að semja við kröfuhafa en nú liggur fyrir óundirritað samkomulag sem við vonumst til að gengið verði frá innan skamms,“ segir Guðbrandur í tilkynningunni.

„Aðlögunaráætlun okkar gerir ráð fyrir að tekjur Reykjanesbæjar haldi áfram að vaxa með fjölgun íbúa, hærra atvinnustigi og auknum tekjum Reykjaneshafnar í kjölfar aukinnar skipaumferðar vegna uppbyggingar hafnsækinnar starfsemi í Helguvík. Við reiknum með að lækka útsvar bæjarbúa til jafns við það sem gengur og gerist á landinu, endurfjármögnum skuldir Reykjaneshafnar og gerum ráð fyrir að Eignarhaldsfélaginu Fasteign ehf. verði skipt í tvennt, en á móti kemur talsverð útgjaldaaukning vegna nýrra grunn- og leikskóla svo eitthvað sé nefnt,“ segir hann.

Aðlögunaráætlun Reykjanesbæjar verður endurskoðuð eftir því sem forsendur breytast fram til ársins 2022 en hún og forsendur hennar hafa verið kynnt kröfuhöfum, eftirlitsnefnd með fjármálum sveitarfélaga og fleiri aðilum sem hagsmuna eiga að gæta.

Ársreikningur Reykjanesbæjar 2016 hefur verið lagður fram til fyrri umræðu í bæjarstjórn Reykjanesbæjar. Þar kemur fram að rekstrartekjur sveitarfélagsins hafi numið rúmum 19 milljörðum króna samkvæmt samanteknum rekstrarreikningi fyrir A- og B-hluta Reykjanesbæjar á árinu 2016. Einnig kemur þar fram að rekstrarniðurstaða bæjarsjóðs og samstæðu hafi verið betri en áætlanir gerðu ráð fyrir. 

Í tilkynningu frá Reykjanesbæ segir:

„Samkvæmt samanteknum rekstrarreikningi fyrir A og B hluta Reykjanesbæjar á árinu 2016 námu rekstrartekjur sveitarfélagsins 19.205,8 milljónum króna. Rekstrartekjur bæjarsjóðs A-hluta námu 12.647,4 milljónum króna. Laun og launatengd gjöld samstæðu A og B hluta sveitarfélagsins námu 6.586,6 milljónum króna. Laun og launatengd gjöld A-hluta bæjarsjóðs námu 5.353,1 milljón króna. Meðaltal stöðugilda samstæðu A og B hluta var 813 og meðaltal stöðugilda A-hluta 718.

Veltufé frá rekstri A-hluta bæjarsjóðs fyrir afskriftir og fjármagnsliði var jákvætt um 1.759,1 milljón króna en að teknu tilliti til afskrifta og fjármagnsliða er rekstrarniðurstaða jákvæð um 48,9 milljónir króna. Veltufé frá rekstri samkvæmt samanteknum rekstrarreikningi samstæðu A og B hluta fyrir afskriftir og fjármagnsliði nam 4.225,9 milljónum króna en að teknu tilliti til þeirra liða var niðustaðan jákvæð um 126,6 milljónir króna.

Skuldaviðmið samstæðu A og B hluta er 208,5% og hefur lækkað úr 230,53% frá árinu 2015. Skuldaviðmið A-hluta bæjarsjóðs er 166,8% og hefur lækkað úr 191,23% frá árinu 2015.

Íbúafjöldi Reykjanesbæjar í lok árs 2016 var 16.359 og fjölgaði um 7,4% frá fyrra ári.

Bæjarsjóður (A-hluti):

Bæjarsjóður, sem sinnir öllum almennum rekstri bæjarins, skilar jákvæðu veltufé frá rekstri fyrir afskriftir og fjármagnsliði (EBITDA) um 1.759,1 milljón króna, sem er 13,91% af tekjum. Eftir afskriftir er veltufé frá rekstri 1.370,9 milljónir króna eða 10,84% af tekjum. Eftir fjármagnsliði,  reikningshaldslegar afskriftir og óvenjulega liði er rekstrarniðurstaða jákvæð um 48,9 milljónir króna en viðaukaáætlun gerði ráð fyrir 486,7 milljóna króna rekstrarhalla á bæjarsjóði.

Eignir bæjarsjóðs eru bókfærðar á 26.606,5 milljónir króna. Þar af eru veltufjármunir 3.092,5 milljónir króna. Skuldir bæjarsjóðs með lífeyrisskuldbindingum og leiguskuldbindingum eru 23.502,4 milljónir króna, þar af eru skammtímaskuldir 2.422,5 milljónir króna.

Vaxtaberandi langtímaskuldir A-hluta bæjarsjóðs við lánastofnanir eru 1.921,5 milljónir króna og heildarleiguskuldbindingar eru um 14.169,9 milljónir króna.

Í sjóðsstreymi sést að hreint veltufé frá rekstri er 1.721,6 milljónir króna en handbært fé frá rekstri er jákvætt um 1.219,1 milljón króna.

Veltufjárhlutfall er 1,28 og hækkar úr 0,67 frá árinu 2015.

Bókfært eigið fé hjá A-hluta bæjarsjóðs er 3.104,1 milljón króna. Eiginfjárhlutfall bæjarsjóðs hækkar á milli ára úr 10,1% í 11,67%.

Skuldaviðmið er 166,8% og skuldahlutfall er 185,83%.

Samstæða (A og B hluti):

Samstæða A og B-hluta skilar jákvæðu veltufé frá rekstri fyrir afskriftir og fjármagnsliði (EBITDA) um 4.225,9 milljónir króna sem er 22,0% af tekjum. Eftir afskriftir er jákvætt veltufé frá rekstri um 3.040 milljónir króna sem er 15,83% af tekjum. Eftir fjármagnsliði,  reikningshaldslegar afskriftir og óvenjulega liði er rekstrarniðurstaða jákvæð um 126,6 milljónir króna en viðaukaáætlun gerði ráð fyrir 73,9 milljóna króna rekstrarafgangi samstæðu A og B hluta.

Eignir samstæðu eru bókfærðar á 51.934,7 milljónir króna, þar af eru veltufjármunir 6.146,6 milljónir króna. Skuldir samstæðu með lífeyrisskuldbindingum og leiguskuldbindingum eru 44.536,9 milljónir króna, þar af eru skammtímaskuldir 5.926,7 milljónir króna.

Vaxtaberandi langtímaskuldir samstæðu við lánastofnanir eru 17.065,6 milljónir króna og heildarleiguskuldbindingar eru 13.961,6 milljónir króna.

Í sjóðsstreymi sést að hreint veltufé frá rekstri er 2.830,6 milljónir króna. Handbært fé frá rekstri er 2.996,7 milljónir króna.

Veltufjárhlutfall er 1,04 og hækkar úr 0,96 frá árinu 2015.

Bókfært eigið fé hjá samstæðu með hlutdeild minnihluta er 7.397,8 milljónir króna. Eiginfjárhlutfall samstæðu hækkar á milli ára úr 12,92% 14,24%.

Skuldaviðmið samstæðu er 208,5% og skuldahlutfall er 231,89%.“

mbl.is
Fleira áhugavert
Fleira áhugavert