Umhverfisstofnun tilkynnti forsvarsmönnum United Silicon með bréfi miðvikudaginn fyrir páska að ekki yrði hjá því komist að loka kísilverinu vegna þess að frá því streymdi fjöldi efna sem gætu haft langtímaáhrif á heilsufar fólks. Greint er frá þessu í Fréttablaðinu í dag.
Mbl.is greindi frá því í gær að ákveðið hafi verið á skírdag að ef óundirbúið ofnstopp, sem varaði í klukkustund eða lengur, ætti sér stað myndi United Silicon ekki ræsa ofninn aftur, alla vega ekki á meðan norðlægar áttir væru ríkjandi.
Eldur kom upp í kísilveri United Silcon aðfaranótt þriðjudags og liggur framleiðsla nú niðri, en ekki liggur fyrir hversu lengi sú stöðvun mun vara.
Vegna brunans þurfti að fresta komu norskra sérfræðinga í kísilverið um einn dag en þeir hyggjast rannsaka starfsemina og reyna að finna út úr því hvernig hægt er að koma í veg fyrir lyktarmengun sem leggst yfir nágrennið þegar kveikt er á brennsluofnunum.