Umhverfisstofnun fer nú yfir þær tvær stöðuskýrslur sem stofnunin hefur fengið sendar frá norska ráðgjafafyrirtækinu Multikonsult varðandi kísilmálmverksmiðju United Silicon í Helguvík. Sigrún Ágústsdóttir, sviðstjóri hjá Umhverfisstofnun, segir sérfræðinga stofnunarinnar vera að fara yfir skýrslurnar í samstarfi við norska ráðgjafafyrirtækið Norconsult.
Sigrún gerir ráð fyrir að það muni taka daga frekar en vikur að ljúka við að fara yfir skýrslurnar, en segir stofnunina ekki munu tjá sig um þær fyrr en að vinnu lokinni. Hún staðfestir þó að í skýrslunum sé að finna tillögur varðandi prufukeyrslu á ljósbogaofni United Silicon. Ekkert liggi hins vegar fyrir um það hvort og þá hvenær slík tilraunaræsing verði heimiluð.
Ofninn hefur ekki verið í gangi frá því að eldur kom upp í kísilmálmverksmiðjunni þriðjudaginn 18. apríl. Viku síðar sendi Umhverfisstofnun frá sér tilkynningu um að stofnunin hafi stöðvað rekstur verksmiðjunnar vegna ítrekaðrar lyktarmengunar og að ofninn verði ekki ræstur aftur nema að gefnu leyfi og í samráði við stofnunina.
United Silicon gerði ekki athugasemdir við þá ákvörðun og hafa sérfræðingar frá norska ráðgjafafyrirtækinu Multikonsult undanfarnar vikur aðstoðað fyrirtækið við að draga úr menguninni. Sérfræðingar frá framleiðanda ljósbogaofnsins hafa sömuleiðis unnið að því að bæta stöðugleika ofnsins, enda er talið að lyktin sem íbúar Reykjanesbæjar finna komi þegar ofninn er undir ákveðnu álagi eða þegar slokknar á honum.
Haft var eftir Kristleifi Andréssyni, stjórnanda öryggis- og umhverfismála hjá United Silicon, í mbl.is í síðustu viku að sérfræðingar frá framleiðanda ofnsins séu búnir að vera að vinna að lagfæringum og breytingum á ofninum undanfarið. Fréttastofa RÚV hafði eftir Kristleifi nú í dag að þeirri vinnu væri að ljúka.
Sigrún segir sérfræðinga Umhverfisstofnunar munu fara yfir allar ráðstafanir fyrirtækisins í þessum efnum og nokkuð sé í að þeirri vinnu ljúki. Það kunni vel að taka einhverjar vikur. Hún útilokar þó ekki að tilraunaræsing verði heimiluð fyrir þann tíma, en segir það fara eftir því hvort skýrslurnar gefi ástæðu til.