Matvælastofnun hefur lagt dagsektir á hrossaeigenda á Austurlandi vegna ástands girðingar þar sem hross hans eru haldin. Óheld girðing meðfram þjóðvegi veldur hættu fyrir dýr og menn, auk þess sem víra- og snæraflækjur innan girðingar valda slysahættu fyrir hestana. Kröfur stofnunarinnar um úrbætur hafa ekki verið virtar. Þetta kemur fram í tilkynningu.
Hrosseigandinn hafði fimm daga til að gera úrbætur á girðingunni. Hann gerði það ekki og þarf því að greiða dagsektir sem nema 25 þúsund krónum á dag.
Þetta er gert samkvæmt reglugerð nr. 940/2015 um beitingu og hámark dagsekta í opinberu eftirliti.