Sextán viðskiptavinir Rarik höfðu um miðjan dag í gær tilkynnt tjón á rafmagnstækjum vegna spennusveiflu að morgni miðvikudags þegar truflanir urðu á flutningskerfi Landsnets.
Tryggvi Þór Haraldsson, forstjóri Rarik, segir að mesta tjónið virðist hafa verið á Kirkjubæjarklaustri og í nágrenni en einnig séu að berast tilkynningar um tjón í kringum Egilsstaði, að því er fram kemur í umfjöllun um mál þetta í Morgunblaðinu í dag.
Tryggvi segir að umfangið sé enn ekki orðið ljóst. Það taki tíma fyrir fólk að átta sig á tjóni sínu og síðan að setjast niður til að skrá það og senda tilkynningu. Hægt er að tilkynna tjón með því að fylla út eyðublað sem finna má á vef Rarik.