Baldur Arnarson
Þrettán kjarnastöðvar verða við áformaða borgarlínu á höfuðborgarsvæðinu. Að auki verður fjöldi biðstöðva við borgarlínuna.
Þetta má lesa úr nýjum tillögum að breyttu aðalskipulagi sveitarfélaganna á höfuðborgarsvæðinu.
Kjarnastöðvarnar eiga að vera í meginkjörnum höfuðborgarsvæðisins, frá miðbæ Hafnarfjarðar í suðri til Háholts í Mosfellsbæ í norðri. Sjö þeirra verða í Reykjavík.
Með tillögunum eru samgöngu- og þróunarásar afmarkaðir fyrir borgarlínuna. Hefur því verið stigið skref í að festa legu hennar í sessi.
Meðfram þessum ásum á að byggja þúsundir íbúða. Verða byggingarheimildir því auknar við kjarnastöðvar og meðfram borgarlínu. Fækkun bílastæða á að auka notkun almenningssamgangna. Mega mest vera 0,7 stæði á hverja 100 fermetra við kjarnastöðvar.