S. Björn Blöndal, formaður borgarráðs Reykjavíkur, telur að eftir á að hyggja hefði verið heppilegra að láta vita fyrr af bilun skólpdælustöðvar við Faxaskjól. Gerlamagn austan við skólpdælustöð við Faxaskjól mældist yfir viðmiðunarmörkum nú í hádeginu.
Áður hefur verið greint frá því að dælustöðin hafi verið biluð í tíu sólahringa og á þeim tíma flæddu á hverri sekúndu 750 lítrar af óhreinsuðu skólpi út í hafið.
Björn bendir á að tilkynningar sem þessar séu á forræði heilbrigðiseftirlits. Umræðan hafi verið á þá leið að af þessu hefði mátt láta vita fyrr. „Heilbrigðiseftirlit starfar á grundvelli ákveðinna laga og hefur mikið sjálfstæði. Við erum búin að fara yfir þetta með heilbrigðiseftirlitinu og það mat það sem svo að það stafaði ekki hætta af þessu. Hins vegar er þetta ógeðfellt fyrir fólk.“
Samkvæmt reglugerð nr. 798/1999 skal fjöldi hitaþolinna kólíbaktería eða saurkokka í a.m.k. 90% tilfella vera undir 100 pr. 100 ml utan þynningarsvæðis miðað við lágmark 10 sýni við fjörur. Sýni sem Heilbrigðiseftirlit Reykjavíkur tók í júní voru yfir viðmiðunarmörkunum en innan skekkjumarka að sögn heilbrigðisfulltrúa hjá Heilbrigðiseftirliti Reykjavíkur
„Heilbrigðiseftirlitið hefur sagt að eftir á að hyggja hefði verið heppilegra að tilkynna um þetta fyrr. Við förum yfir í framhaldinu hvort að það þurfi að breyta eitthvað verklagi varðandi tilkynningar um mál sem þessi,“ segir Björn og bætir við að öll svona mál séu til að læra af þeim.