Ekki liggur fyrir játning í manndrápsmálinu í Mosfellsdal, en sakborningar hafa þó tjáð sig í yfirheyrslum. Þetta segir Grímur Grímsson yfirlögregluþjónn í samtali við mbl.is, en eins og greint var frá í gær hefur lögreglan á höfuðborgarsvæðinu sent héraðssaksóknara gögn málsins.
Rannsókninni er svo gott sem lokið, en enn á eftir að yfirheyra einn einstakling vegna málsins. Grímur vill ekki gefa upp hver það er sem á eftir að yfirheyra eða hvort um sé að ræða sakborning eða vitni. „Þessi yfirheyrsla er ekkert aðalatriði í þessari rannsókn en við vorum sammála um að hún þyrfti að fara fram,“ segir Grímur.
Þá bendir hann á að ekki sé heimilt að halda mönnum í gæsluvarðhaldi lengur en í 12 vikur án þess að gefin sé út ákæra en gæsluvarðhaldsúrskurður yfir Sveini Gesti Tryggvasyni rennur út seinna í þessum mánuði. Sveinn Gestur er sá eini af þeim sex sem handteknir voru í tengslum við andlát Arnar Jónssonar Aspar, sem enn situr í gæsluvarðhaldi.
Fimm aðrir voru upphaflega úrskurðaðir í gæsluvarðhald en þau eru enn grunuð um aðild að manndrápinu.