Innlent | mbl | 9.8.2017 | 11:47 | Uppfært 12:02

Skýrt brot á jafnréttislögum

Um skýrt lögbrot var að ræða í máli rútubílstjóra sem fékk ekki að fara í fjögurra daga rútuferð vegna þess að ferðamennirnir vildu ekki kvenkyns rútubílstjóra. Kristín Ástgeirsdóttir, framkvæmdastýra Jafnréttisstofu, bendir á skyldu atvinnurekenda um að sjá til þess að starfsfólki sínu sé ekki mismunað á grundvelli kyns. mbl.is/Ófeigur Lýðsson

Kristín Ástgeirsdóttir, framkvæmdarstýra Jafnréttisstofu, segir að um skýrt lögbrot sé að ræða í máli rútubílstjóra sem fékk ekki að fara í fjögurra daga rútuferð vegna þess að ferðamennirnir vildu ekki kvenkyns rútubílstjóra. „Það er verið að mismuna fólki í starfi á grundvelli kyns.“

Í 24. grein laga um jafna stöðu og jafnan rétt kvenna og karla segir: „Hvers kyns mismunun á grundvelli kyns, hvort heldur bein eða óbein, er óheimil.“ Segir Kristín að fyrirtækið, með því að neita konunni um að fara í ferðina, hafi brotið gegn þessari grein.

Frétt af mbl.is

Vildu ekki kvenkyns bílstjóra

Frétt af mbl.is

Af og til óskað eftir öðrum bílstjóra

„Það eru skyldur atvinnurekenda að sjá til þess að fólki sé ekki mismunað og þeir eiga að vinna að jafnrétti innan sinna fyrirtækja; þeir eiga að vinna að því að fjölga konum í stjórnunarstöðum og þeir eiga að sjá til þess að störf flokkist ekki í sérstök karla eða kvennastörf,“ segir Kristín og bætir við: „Má segja að þarna sé ákveðin tilhneiging til þess.“

Efnahagslegir hagsmunir rekast á menningarlega hagsmuni

Kristín segir að það sé í höndum konunnar að kæra viðkomandi fyrirtæki en það hefur hún ekki gert. Þá getur Jafnréttisstofa kallað eftir upplýsingum frá viðkomandi fyrirtæki og bent þeim á að þarna hafi þeir brotið á jafnréttislögum.

„Hér gilda reglur um það að konur og karlar hafa jafnan aðgang að öllum störfum,“ segir Kristín og bætir við: „Mér finnst þetta kalla á að herða á fræðslu til ferðamanna.“ Ljósmynd/Ásdís Ásgeirsdóttir

Frétt af mbl.is

Vildu ekki kvenkyns bílstjóra

Konan átti að fara með ferðamennina í fjögurra sólarhringa ferð og segir Kristín að þarna hafi hún misst af miklum tekjum og því sé bæði um persónulegt tjón að ræða auk þess sem verið sé að brjóta á viðkomandi.

„Hinir efnahagslegu hagsmunir eru hérna að rekast á menningarlega hagsmuni; menningarlega stöðu okkar,“ segir Kristín.

Skilyrði um menningarlega og félagslega þekkingu

Kristín segir þetta vekja margar spurningar, meðal annars hversu vel erlendir ferðamenn eru upplýstir um lög og menningu á Íslandi. „Hér gilda reglur um það að konur og karlar hafa jafnan aðgang að öllum störfum,“ segir hún og bætir við: „Mér finnst þetta kalla á að herða á fræðslu til ferðamanna.“

Er það í höndum ferðamálayfirvalda og fyrirtækja að setja ferðaþjónustufyrirtækjum sem starfa hér á landi skilyrði um menningarlega þekkingu, félagslega þekkingu og að mönnum beri að virða lög landsins, hvort sem það eru íslenskir eða erlendir aðilar.