Óvenju mikil aðsókn hefur verið í Kvennaathvarfið það sem af er ári. Á fyrri helmingi ársins dvöldu 81 kona og 60 börn í athvarfinu. Til samanburðar dvöldu þar 116 konur og 79 börn allt árið í fyrra.
Eins og greint var frá fyrr á árinu dvöldu konur að meðaltali í 28 daga í athvarfinu á síðasta ári og hefur meðaldvöl aldrei verið lengri. Meðaldvölin lengist hins vegar enn, en á fyrstu sex mánuðum ársins dvöldu konur að meðaltali í 30 daga í athvarfinu og börn í 31 dag.
Í þessum hópi voru 20 íbúar; 9 konur og 11 börn, sem ekki hafa enn útskrifast og því er dvöl þeirra orðin talsvert lengri en hún var í lok júní.
Á fyrri hluta ársins dvöldu að meðaltali 23 íbúar í húsinu á hverjum degi, 13 konur og 10 börn. Þetta meðaltal hefur aldrei verið hærra, en árið 1994 voru að meðaltali 20 íbúar í húsinu á dag. Önnur ár hafa þeir verið talsvert færri, en sem dæmi voru að meðaltali 18 íbúar í húsinu á dag í fyrra; 9 konur og 9 börn.
„Þessi mikli fjöldi íbúa skýrist bæði af því að fleiri konur en áður leituðu til athvarfsins á fyrri hluta ársins og því að konur dvelja lengur, einkum vegna þess að þær eiga erfitt með að komast í nýtt húsnæði,“ segir í skriflegu svari við fyrirspurn mbl.is.
Í nýlegum framkvæmdum í athvarfinu var svefnherbergjum fjölgað úr 8 í 11.
Ráðgjafar úr Kvennaathvarfinu eru með fasta viðveru í Bjarkarhlíð, miðstöð fyrir þolendur ofbeldis, einn morgun í viku og taka viðtöl við konur sem þangað hafa leitað vegna heimilisofbeldis. Samkvæmt upplýsingum frá Kvennaathvarfinu er hins vegar ekki hægt að rekja aukinn fjölda kvenna í dvöl beint til opnunar Bjarkarhlíðar.
Eins og mbl.is greindi frá í vikunni komu hátt í fimmtíu ofbeldismál inn á borð Bjarkarhlíðar í júlí. Aldrei hafa fleiri mál komið inn á borð miðstöðvarinnar á einum mánuði, frá opnun hennar í mars. Af málunum fimmtíu fóru um fjörtíu inn á borð lögreglu.
Frétt mbl.is: Metfjöldi til bráðamóttöku í júlí
Eins og greint var frá á dögunum kom einnig metfjöldi mála á einum mánuði á borð neyðarmóttöku fyrir þolendur kynferðisofbeldis í júlí, þegar tuttugu og átta manns leituðu þangað. Samtals hefur 41 einstaklingur leitað til neyðarmóttökunnar í júní og júlí, og 110 það sem af er ári. Í fyrra leituðu fleiri en nokkru sinni á neyðarmóttökuna, en þá voru 169 komur skráðar.