„Afinn sem fór á flug“ látinn

Maðurinn sem lést í Reynisfjöru í gær hét David Frederick McCord en var þekktur undir viðurnefninu Grampa Dave. Hann var kanadískur og skilur eftir sig dóttur og tvö barnabörn. Grampa Dave var mikill áhugamaður um svifvængjaflug og í ítarlegu viðtali við Sunnudagsútgáfu Morgunblaðsins í byrjun júlí sagði hann íþróttina hafa breytt lífi sínu.

Frétt af mbl.is

Lést við Reynisfjöru eftir svifflug

„Eft­ir að ég fór á eft­ir­laun var ég allt í einu frír og frjáls og svo fædd­ist fyrsta barna­barnið og ég fór að hugsa um að láta líf mitt fara í allt aðrar átt­ir. Og ég gerði það og fór að stunda svif­vængja­flug 64 ára,“ sagði Grampa Dave m.a. við blaðamann Morgunblaðsins.

Frétt af mbl.is

Afinn sem fór á flug

McCord bjó í afturhluta trukks í Vík í Mýrdal. mbl.is/Ásdís Ásgeirsdóttir

Í viðtalinu greindi ævintýramaðurinn frá því hvernig hann hefði eitt sinn lent á trjátoppi eftir flugferð og setið þar fastur, hvernig hann hefði losað sig við allar veraldlegar eigur sínar og að hann væri á Tinder.

Þá sagðist hann kunna vel við sig í Vík, þar sem hann bjó aftur í trukk.

„Það er alltaf eitt­hvað að gera hérna; kjafta við fólkið, drekka bjór og spila fris­bí­golf. Svo elt­ist ég við sætu þjón­ustu­stúlk­urn­ar hér. Þær segja mér að hypja mig í burtu,“ sagði hann í gríni við blaðamann.

Samkvæmt upplýsingum frá lögreglunni á Suðurlandi var rætt við vitni í gær en rannsókn á tildrögum slyssins stendur enn yfir.

Grampa Dave svífur um loftin blá.

• Blogga um frétt