Ístak mun sjá um byggingu nýrrar heitrar laugar við Langasand sem bera mun nafnið Guðlaug. Samningar hafa verið undirritaðir milli Akraneskaupstaðar og Ístaks um framkvæmdina, en verkið felur í sér uppsteypu auk tilheyrandi jarðvinnu og frágangs umhverfis.
Í tilkynningu segir að Guðlaug verði „einkar glæsilegt steinsteypt mannvirki,“ en laugin verður staðsett í brimvarnargarðinum á Langasandi.
Mannvirkið mun þjóna fjórþættu hlutverki sem birtist í þremur hæðum þess og tröppum. Þriðja hæðin verður útsýnispallur, á annarri hæð verður heit setlaug, sturtur og tækjarými og á fyrstu hæð verður grunn vaðlaug. Á milli hæða verða tröppur sem mynda tengingu milli bakkans og fjörunnar.
Ráðgert er að framkvæmdir hefjist á næstu dögum og verði lokið 30. júní 2018.