Aðalmeðferð í máli ákæruvaldsins á hendur Thomasi Møller Olsen, sem ákærður er fyrir að hafa banað Birnu Brjánsdóttur þann 14. janúar síðastliðinn, er áfram haldið í Héraðsdómi Reykjaness í dag.
Fyrstur á vitnalista er Sebastian Kunz réttarmeinafræðingur sem framkvæmdi réttarkrufningu á líki Birnu. Dómari tók til máls við upphaf þinghalds og sagði að ákveðið hefði verið að vitnisburður Kunz færi fram fyrir luktum dyrum vegna þess að viðkvæm persónuleg atriði um heilsufar Birnu myndu koma fram í máli hans. Þá yrðu einnig birtar myndir. Hvorki ákæruvald né verjandi gerðu athugasemd við það.
Er óskað eftir þessu að beiðni fjölskyldu Birnu en dómari sagði við upphaf þinghalds að málið hefði haft mikil áhrif á fjölskyldu hennar. Var meðal annars lagt fram vottorð frá séra Vigfúsi Bjarna Albertssyni sjúkrahúspresti.
Aðrir sem munu bera vitni í dag eru Mario Darok sem einnig er réttarmeinafræðingur, Grímur Grímsson yfirlögregluþjónn sem stýrði rannsókn málsins, Sigurður Páll Pálsson geðlæknir og fleiri. Er þetta þriðji síðasti dagur aðalmeðferðar og gert er ráð fyrir að vitnaleiðslum ljúki um ellefuleytið. Munnlegur málflutningur fer fram eftir hádegi.