Búast má við talsverðum hlýindum á norður- og austurhluta landsins um helgina. Á föstudag verður mesti hitinn á Akureyri en á laugardag og sunnudag verður besta veðrið á Egilsstöðum.
Talsverðar sviptingar verða í veðrinu fram að helgi, sérstaklega á Austurlandi. Gert er ráð fyrir næturfrosti á Brú á Jökuldal aðfaranótt föstudags. Einnig er gert ráð fyrir slyddu eða snjókomu á Seyðisfirði í kvöld og snjókomu á Fjarðarheiði.
Heldur fer að hlýna um helgina, en hæst fer hitinn í 15 gráður á Akureyri á föstudag. Um helgina verður síðan hlýjast á Austurlandi en samkvæmt vef Veðurstofunnar má gera ráð fyrir 20 gráða hita á Egilsstöðum og þar í kring.
Hitamet í september var sett fyrsta dag mánaðar. Metið var sett á Egilsstöðum en þar mældist hitinn 26,4 gráður á mælinum við flugvöllinn.
Fyrra hitamet í september er frá árinu 1949 á Dalatanga en þar mældist hiti 26,0 stig 12. september það árið. Þann 14. september 1988 mældist hiti 25,8 gráður einnig á Dalatanga og er það þriðji hlýjasti dagur septembermánaðar frá upphafi mælinga.