Ekki eru taldar miklar líkur á að heildarsamkomulag náist á fundum strandríkja í næsta mánuði um uppsjávarveiðar í Norður-Atlantshafi. Í makríl, kolmunna og norsk-íslenskri síld hefur síðustu ár verið veitt umfram ráðgjöf vísindamanna og samstaða hefur ekki náðst á fundum um stjórnun veiðanna.
Ekki er talið líklegt að útganga Breta úr Evrópusambandinu auki líkur á samkomulagi í þessari lotu. Spyrja má hvers vegna Bretar og Evrópusambandið ættu að binda sig með samningum áður en Brexit er afstaðið.
Ráðgjöf Alþjóða hafrannsóknaráðsins, ICES, er væntanleg næsta föstudag og í kjölfarið setjast embættismenn frá strandríkjunum að samningaborði. Staða ríkjanna er mismunandi hvað varðar einstaka stofna þessara verðmætu uppsjávartegunda, að því er fram kemur í fréttaskýringu um þetta efni í Morgunblaðinu í dag.