Hjúkrunarfyrirtækið Sinnum er með réttarstöðu sakbornings í máli Ellu Dísar Laurens, átta ára stúlku sem lést árið 2014. Þetta staðfestir Kolbrún Benediktsdóttir varahérasaksóknari við mbl.is, en málið barst embætti Héraðssaksóknara í gær að lokinni rannsókn lögreglu.
Áður hefur verið greint frá því að starfsmaður Sinnum hefði réttarstöðu sakbornings í rannsókn lögreglu á málinu.
Ella Dís var átta ára gömul þegar hún lést eftir að hafa orðið fyrir heilaskaða í umsjón fyrirtækisins. Það var Reykjavíkurborg sem keypti þjónustuna af Sinnum, en borgin hefur ekki skipt fyrirtækið síðastliðin tvö ár.
Héraðsdómur Reykjavíkur dæmdi Sinnum í síðustu viku til að greiða Rögnu Erlendsdóttur, móður Ellu Dísar, þrjár milljónir króna í bætur vegna andláts dóttur hennar.
Ragna hafði stefnt fyrirtækinu og Reykjavíkurborg vegna stórfellds gáleysis sem hafi valdið dauða Ellu Dísar. Var það mat Héraðsdóms að andlát Ellu Dísar yrði rakið til stórfellds gáleysis stjórnenda Sinnum ehf., sem hefðu sett ófaglærðan starfsmann í aðstæður sem hann gat ekki ráðið við, en Ella Dís var með sjaldgæfan taugasjúkdóm og var háð öndunarvél.
Skóla- og frístundasvið Reykjavíkurborgar gerði samning við Sinnum vegna skólagöngu Ellu Dísar, en fyrirtækið gefur sig út fyrir að bjóða upp á fjölþætta velferðarþjónustu til einstaklinga. Á grundvelli samningsins sinnti fyrirtækið sértækum stuðningi við Ellu Dís í skólanum, en henni fylgdi m.a. þroskaþjálfi sem aðstoðaði hana í þar. Ella Dís var með sérstakan vinnustól í skólanum og útbúin var aðstaða inni af skólastofunni fyrir hana og hennar tæki, auk sjúkrarúms ef hún yrði of þreytt og þyrfti að hvíla sig. Hún var tengd við öndunarvél gegnum barkatúbu í hálsi og mettunarmæli sem sýndi súrefnismettun í blóði og hjartslátt.
Þroskaþjálfarinn sem að staðaldri fylgdi Ellu Dís í skólann forfallaðist einn daginn vegna veikinda og var ófaglærður starfsmaður Sinnum ehf. fenginn til að fylgja henni í skólann. Sá þekkti Ellu Dís og hafði sinnt henni í afleysingum, en aldrei án aðstoðar.
Þegar starfsmaðurinn flutti Ellu Dís úr hjólastól hennar í vinnustólinn í skólanum féll súrefnismettun og hjartsláttur hækkað. Starfsmaðurinn reyndi þá án árangurs að nota sog- og hóstavél, auk þess að hringja í Neyðarlínuna eftir aðstoð. Sjúkraflutningamenn komu á staðinn sex mínútum síðar og var Ella Dís þá komin í öndunar- og hjartastopp.
Endurlífgunartilraunin bar árangur og var Ella Dís flutt á bráðamóttöku barna og þaðan á gjörgæsludeild. Ragna sagði Ellu Dís hafa orðið fyrir miklum heilaskaða við atvikið og hafi hún aldrei hafa sýnt eðlileg viðbrögð eftir það og þar til hún lést 5. júní árið 2014.
Í dómi Héraðsdóms segir að samkvæmt tilkynningu Sinnum til Landlæknis þá hafi starfsmaðurinn verið sérþjálfaður, en dómurinn komst hins vegar að þeirri niðurstöðu að ekkert benti til að starfsmaðurinn hefði fengið nægilega fræðslu um umönnun barna í öndunarvél.
Segir RÚV rannsókn lögreglu og saksóknara m.a. beinast að því hvort Sinnum hafi ekki greint rétt frá í tilkynningunni til Landlæknis.