Hrafnista og Grund stefna ríkinu vegna vangoldinnar leigu

Hjúkrunarheimilið Grund hefur ásamt fleiri heimilum stefnt ríkinu vegna vangoldinnar …
Hjúkrunarheimilið Grund hefur ásamt fleiri heimilum stefnt ríkinu vegna vangoldinnar leigu. mbl.is/Ómar Óskarsson

Grund hjúkrunarheimili í Reykjavík, dvalar og hjúkrunarheimilið Ás í Hveragerði, Hrafnistuheimili Sjómannadagsráðs í Reykjavík og Hafnarfirði hafa stefnt ríkinu vegna vangoldinnar leigu fyrir afnot af húsnæði heimilanna. 

Í fréttatilkynningu frá Grund og Hrafnistuheimilunum segir að búið sé að birta Óttari Proppé heilbrigðisráðherra stefnu fyrir Héraðsdómi Reykjavíkur vegna málsins.

Á heimilunum sé veitt sérhæfð þjónusta við umönnun aldraðra sem íslenska ríkinu beri lögum samkvæmt að veita, en sem það hefur falið heimilunum að inna af hendi fyrir sína hönd.

Vakin er athygli á því að bygging Hrafnistuheimilanna hafi verið fjármögnuð með sjálfboðavinnu og fjáröflun og að Grund og Ás hafi verið rekin með greiðsluþátttöku íbúa allt þar til að ríkið tók yfir málaflokkinn á níunda áratug síðustu aldar.

Kröfu um afnotagjöld ávallt hafnað

 „Á þeim sama tíma hóf ríkið að ákveða einhliða hvaða öldruðu einstaklingar uppfylltu skilyrði til búsetu á hjúkrunarheimilum landsins,“ segir í fréttatilkynningu Hrafnistu. Heimilin hafi þá farið að fá  daggjöld frá ríkinu. „Þrátt fyrir þessa einhliða breytingu af hálfu ríkisvaldsins hefur ríkið ávallt hafnað því að greiða Hrafnistu endurgjald fyrir að leggja ríkinu til húsnæði undir rekstur hjúkrunarheimila í Reykjavík og Hafnarfirði. Í stefnunni er því krafist eðlilegs gjalds fyrir afnotin.“ Í fréttatilkynningu Grundar og Ás er lögð fram samskonar krafa.

Benda heimilin á að ríkið greiði fjölmörgum aðilum sérstakt gjald fyrir afnot af húsnæði hjúkrunarheimila sambærileg þeim heimilin leggi ríkinu til. „Dæmi um það eru hjúkrunarheimili sem sveitarfélög hafa byggt og fjármagnað á undanförnum árum, en ríkið greiðir þeim gjald fyrir afnot af húsnæðinu. Þá hefur ríkið einnig gert sambærilega samninga við einkaaðila, t.d. eigendur Sóltúns í Reykjavík þar sem ríkið greiðir sérstakt mánaðarlegt daggjald fyrir afnot sín af húsnæðinu,“ segir í tilkynningu Grundar og Áss.

Vekja Hrafnistuheimilin, Grund og Ás athygli á að þetta mánaðarlega daggjald hafi þeim aldrei staðið til boða „þrátt fyrir ítrekaðar óskir þar um“.

Ríkið nýti sér húsnæði heimilanna án þess að greiða krónu fyrir afnot sín af húsnæðinu á sama tíma og það greiðir fyrir afnot sín af húsnæði t.d. Markar hjúkrunarheimilis, sem Grund hefur rekið um sjö ára skeið.  Er það mat heimilanna að þessi staðreynd „feli í sér alvarlega og ólögmæta mismunun sem nauðsynlegt er að fá skorið úr fyrir dómstólum“.

Þrautalending að hætta núverandi starfsemi

Ríkið hafi heldur ekki greitt fyrir viðhald heimilanna þó að það krefjist mikils viðhalds og eftirlits að viðhalda gæðum þess og tryggja öryggi íbúa í samræmi við lög, reglur og önnur skilgreind viðmið sem ríkið setur. Þess í stað geti heimilin sótt um styrki úr Framkvæmdasjóði aldraðra. Framlag sjóðsins til viðhaldsverkefna hafi þó aldrei numið nema 15% til 40% af kostnaði, en restina hafi heimilin þurft að fjármagna með lántöku.

Ekki verði unað við óbreytt ástand og því nauðsynlegt að fá úr málinu skorið fyrir dómstólum þó að heimilin harmi vissulega að málið sé komið í þennan farveg.

„Takist ekki að semja um greiðslu fyrir afnotin eða fallist dómstóllinn ekki málavexti [Hrafnistu, Grundar og Ás] gæti þrautarlendingin orðið sú að hætta núverandi rekstri hjúkrunarrýma í húsnæðinu og hefja þar aðra starfsemi í þágu aldraðra, t.d. með því að breyta húsnæðinu í leiguíbúðir. Verði málalokin þau mun ríkið þurfa að finna annað húsnæði til afnota fyrir þá starfsemi.“

Húsnæðisþáttur slíkrar þjónustu mun alltaf verða á kostnað ríkisins. Hjúkrunarrými á Grund og í Ási  séu um 300 talsins. Hjúkrunarrými  á Hrafnistu í Reykjavík og Hafnarfirði séu um 400 talsins, eða 15% hjúkrunarrýma á öllu landinu og „kostnaður við að reisa 400 ný hjúkrunarrými yrði ekki undir 12 milljörðum króna,“ segir í tilkynningu Hrafnistu.

mbl.is
Fleira áhugavert
Fleira áhugavert