Slökkvilið höfuðborgarsvæðisins var kallað út vegna elds í gróðri við Hólavallakirkjugarð við Suðurgötu á tólfta tímanum í gærkvöldi. Samkvæmt upplýsingum frá lögreglunni á höfuðborgarsvæðinu urðu engar skemmdir vegna eldsins.
Um miðjan dag í gær kviknaði í ruslafötum og skúr við Gufuneskirkjugarð en greiðlega gekk að slökkva eldinn.
Tæplega þrjú í nótt lokaði lögreglan skemmtistað í miðborginni sem enn var opinn þrátt fyrir að langt var liðið á nóttina. Nokkrum gestum var vísað út og starfsmanni tjáð að skýrsla yrði rituð um málið af hálfu lögreglunnar.
Fjórir ökumenn voru stöðvaðir af lögreglunni á höfuðborgarsvæðinu fyrir akstur undir áhrifum fíkniefna eða áfengis í gærkvöldi og nótt.
Þrír þeirra reyndust undir áhrifum fíkniefna og einn þeirra var einnig réttindalaus. Sá fjórði var undir áhrifum áfengis. Allir voru látnir lausir að lokinni blóðsýnatöku.