Ályktun LÍ byggist á misskilningi

Birgir Jakobsson landlæknir segir að það sé fjarri lagi að hann hafi sagt að að læknar í hlutastörfum sinni ekki sjúklingum sínum af heilum hug. Ályktun Læknafélag Íslands um að landlæknir hafi viðhaft órökstudd ummæli byggist því á misskilningi.

Þetta kemur fram á vef landlæknisembættisins.

Þar segir að á aðalfundi Læknafélags Íslands 20. október sl. hafi verið samþykkt ályktun um að á hádegisfundi BSRB 9. október hafi landlæknir viðhaft órökstudd ummæli þess efnis að læknar í hlutastarfi á Landspítalanum og á stofum úti í bæ starfi ekki á spítalanum af heilum hug. Með þessum orðum hafi landlæknir vegið að starfsheiðri yfir 200 lækna og sakað þá um óheilindi gagnvart sjúklingum og vinnuveitanda.

Frétt af mbl.is

Mótmælir ásökunum landlæknis

„Ályktun LÍ er á misskilningi byggð þar sem ekki er gerður greinarmunur á túlkun blaðamanns og orðum landlæknis. Það er fjarri lagi að landlæknir hafi sagt að læknar í hlutastörfum sinni ekki sjúklingum sínum af heilum hug. Má í því sambandi benda á úttektarskýrslur embættisins þar sem að jafnaði er getið um að á spítalanum starfi mjög hæft starfsfólk sem vinni einhuga að umönnun og meðferð sjúklinga,“ segir í tilkynningunni á vef landlæknisembættisins.

Þar segir ennfremur að landlæknir hafi ítrekað talað um nauðsynleg forgangsverkefni í heilbrigðiskerfinu sem geti stuðlað að gæðum og skilvirkni þess. Meðal þeirra sé efling sérfræðimönnunar á Landspítalanum og fækkun hlutastarfa þar. Forstjóri Landspítalans hafi einnig bent á að það sé almennt mikilvægt að sérfræðilæknar spítalans séu í fullu starfi eða því sem næst en 44% þeirra séu í hlutastarfi um þessar mundir.

„Það er enn skoðun landlæknis að hlutastörf lækna af þeirri stærðargráðu sem um ræðir á LSH skapi vandamál við skipulagningu þjónustunnar og að starfsfólk í hlutastörfum, með fleiri en einn vinnuveitenda, eigi erfitt um vik að setja hagsmunamál aðalvinnuveitanda í forgang,“ segir ennfremur.

• Blogga um frétt