Chesterfield-málinu frestað

Frá aðalmeðferð í héraðsdómi í Chesterfield-málinu. Ákæruvaldið mun nú rannsaka …
Frá aðalmeðferð í héraðsdómi í Chesterfield-málinu. Ákæruvaldið mun nú rannsaka ákveðin atriði málsins að nýju og er málinu frestað á meðan. Golli / Kjartan Þorbjörnsson

Ákveðið var að fresta dómsmeðferð í Chesterfield-málinu svokallaða, sem einnig er þekkt sem CLN-málið. Þetta var ákveðið við fyrirtöku þess í héraðsdómi í gær, en saksóknari málsins staðfestir við mbl.is að málinu hafi verið frestað um ótiltekinn tíma meðan lögregla og ákæruvald rannsaki þau atriði sem Hæstiréttur taldi rétt að yrðu rannsökuð nánar, en Hæstiréttur ógilti fyrri dóm héraðsdóms í síðasta mánuði.

Þrír helstu stjórnendur Kaupþings voru ákærðir í málinu fyrir umboðssvik með því að hafa lánað 508 milljónir evra á tímabilinu ágúst til október 2008 til tveggja félaga og þannig stefnt fjármunum bankans í hættu. Taldi saksóknari að lánin væru með öllu glötuð. Voru lánin notuð til að kaupa lánshæfistengd skuldabréf af Deutsche bank sem tengd voru skuldatryggingaálagi Kaupþings og taldi saksóknari það markmið viðskiptanna að lækka skuldatryggingaálagið. Voru hinir ákærðu allir sýknaðir í héraðsdómi.

Greiðsla frá Deutsche bank kemur óvænt

Eftir að héraðsdómur féll í janúar í fyrra komu fram upplýsingar um að Deutsche bank hefði greitt stóran hluta upphæðarinnar, eða 400 milljónir evra, til þrotabús Kaupþings vegna málsins.

Vegna þessa ákvað Hæstiréttur að aðeins yrðu tekin fyrir tvö atriði málsins, en verjendur í málinu töldu upplýsingarnar breyta miklu varðandi grundvöll málsins og að þær styrktu ekki málflutning ákæruvaldsins. Í kjölfarið var héraðsdómurinn ómerktur og málinu vísað aftur í hérað.

Taldi Hæstirétt­ur að ekki lægi fyr­ir að hvaða ástæðum fall­ist hefði verið á að inna greiðslur sam­kvæmt sam­komu­lag­i Kaupþings og Deutsche bank af hendi né með hvaða rök­um eða á grund­velli hvaða gagna bank­inn og eign­ar­halds­fé­lög­in tvö reistu mál­sókn­ir sín­ar á bend­ur Deutche Bank um greiðslu á.

Þá taldi Hæstirétt­ur að ekki lægi fyr­ir hvers eðlis greiðslurn­ar væru. Þar af leiðandi taldi Hæstirétt­ur að rann­sókn á þess­um atriðum gæti haft þýðingu við mat á því hvort skil­yrðum umboðssvika hefði verið full­nægt og við ákvörðun um refsi­hæð ef skil­yrði sak­fell­ing­ar yrðu tal­in fyr­ir hendi. Sam­kvæmt því var sýknu­dóm­ur­inn og meðferð máls­ins í héraði frá upp­hafi aðalmeðferðar ómerkt og mál­inu vísað heim í hérað til lög­legr­ar meðferðar.

mbl.is
Fleira áhugavert
Fleira áhugavert