Reyna að fá börnin í Bláfjöll

Til stendur að opna byrjendalyfturnar töfrateppið og kaðalinn í Bláfjöllum í fyrramálið, auk slóðar fyrir skíðagöngumenn.

Ákvörðun um þetta verður tekin í fyrramálið. Þá yrðu lyfturnar opnar frá klukkan 11 til 15.

Einar Bjarnason, rekstrarstjóri Bláfjalla, bætir við að slóðin fyrir skíðagöngumenn verði lögð með vélsleða til að fara ekki ofan í möl og grjót en venjan er að snjótroðari sé notaður til verksins.

Mikið hefur snjóað á höfuðborgarsvæðinu en að sögn Einars er snjórinn lítill í brekkunum. „Við ætlum að reyna að fá litlu börnin, upprennandi snillingana, til að koma á morgun. Það er spáð frábæru verði og vonandi fá þau að njóta sín í einn dag,“ segir Einar.

Vinna hefur staðið yfir við að koma snjó í brekkurnar við þessar tvær lyftur síðustu daga.

Spurður út í næstu daga segir Einar að á mánudaginn sé spáð áframhaldandi snjókomu og hugsanlega haldi hún áfram alla vikuna. „Við byrjuðum að vera glaðir 3. nóvember þegar við sáum fyrsta snjóinn. Við erum verulega spenntir.“

• Blogga um frétt