Þurftu að endurprenta heil upplög í jólabókaflóðinu

Tafir og mistök í prentsmiðju í Finnlandi settu íslenska jólabókaflóðið í uppnám um tíma. Yfir 100 þúsund eintök íslenskra bóka eru prentuð þar í landi að þessu sinni og nýr tækjabúnaður í prentsmiðjunni reyndist erfiður ljár í þúfu.

„Þegar fyrstu bækurnar komu í hús þurftum við að láta endurprenta bæði heilu upplögin og kápu. Útkoman var ekki ásættanleg og við létum lagfæra allt sem ekki var 100%. Plastpökkunin uppfyllti ekki gæðakröfur og við þurftum að endurplasta yfir 30.000 eintök hér á landi,“ segir Egill Örn Jóhannsson, framkvæmdastjóri Forlagsins.

Þetta hafði verulega röskun í för með sér og fyrst nú er dreifing komin á áætlun, að því er fram kemur í umfjöllun um þetta mál í Morgunblaðinu í dag.