Þyrlan afturkölluð en send aftur af stað

Einn var fluttur með þyrlu Landhelgisgæslunnar á Landspítalann í Fossvogi eftir bílslys á Sólheimasandi, austan við Jökulsá um klukkan 14 í dag. Tveir bílar skullu saman, jepplingur og fólksbíll. 

Frétt mbl.is: Bílslys á Sólheimasandi

Tveir voru í hvorum bíl og í fyrstu virtust meiðsli fólksins vera minniháttar. Þyrla Landhelgisgæslunnar sem kölluð var út vegna slyssins var afturkölluð þegar fyrstu viðbragðsaðilar komu á staðinn, en hún var svo kölluð út á nýjan leik og sótti einn farþeganna.

Oddur Árnason, yfirlögregluþjónn á Selfossi, segist í samtali við mbl.is ekki hafa frekari upplýsingar um líðan fólksins, en skilst að þyrlan hafi verið kölluð til af öryggisástæðum. Þyrlan lenti við Landspítalann rétt fyrir klukkan 18.

• Blogga um frétt