Keyrði á stelpu og lét sig hverfa

„Frekar mikið sjokkerandi að fá símtal frá barninu sínu að það hafi verið keyrt á það á meðan það gekk yfir gangbraut, sérstaklega þegar mamma og pabbi eru langt í burtu.“ Þannig hefjast skrif Ingibjargar Elínar Halldórsdóttur á Facebook en í gær var keyrt á dóttur hennar þar sem hún var að ganga yfir gangbraut.

Lögreglan á Norðurlandi eystra deildi færslu á Facebook í gær þar sem ökumaðurinn var beðinn um að gefa sig fram. Ökumaðurinn bað dóttur Ingibjargar, Amelíu Rún, afsökunar, settist upp í bíl og ók í burtu. Óhappið átti sér stað á gangbraut á Mýrarvegi við Verkmenntaskólann á Akureyri.

„Amelía missti gleraugun og sjónina fyrst um sinn og sá því ekki ökumanninn né bílinn og veit því ekki um hvern ræðir,“ skrifar Ingibjörg enn fremur. 

Amelía marðist í andliti þegar ekið var á hana í gær. Ljósmynd/Aðsend

Amelía slapp vel en hún marðist talsvert í andliti. Ingibjörg segir að hún og fjölskyldan séu ekki reið en þau telji best fyrir andlega líðan ökumannsins að láta vita af sér til lögreglu:

„Ekki fyrir skammir heldur hreinlega til að fá að vita að það lítur út fyrir að manneskjan sem hann keyrði á hafi sloppið nokkuð vel og einnig til að ökumaður þurfi ekki að bera þetta einn með þeirri vanlíðan sem ég ætla að gefa mér að því fylgi.“

• Blogga um frétt