Héraðsdómur Reykjavíkur hefur úrskurðað manninn og konuna sem voru handtekin í gær vegna rannsóknar á umfangsmikilli vændisstarfssemi í gæsluvarðhald til sjötta desember.
Að sögn Snorra Birgissonar hjá lögreglunni á höfuðborgarsvæðinu tekur núna við hefðbundin rannsóknarvinna, eða áframhaldandi öflun gagna og rannsóknarvinna.
Hann býst ekki við því að fólkið verði yfirheyrt aftur í dag en það var síðast yfirheyrt í gærkvöldi.
Það var handtekið eftir húsleit lögreglu á þremur stöðum í Reykjavík. Á tveimur þeirra voru þrjár konur á þrítugsaldri. Verið er að rannsaka hvort þær séu þolendur mansals.
Maðurinn og konan eru grunuð um að hafa milligöngu um vændi og að hafa viðurværi af vændi annarra. Snorri segir slík mál ekki algeng hér á landi. Í rauninni þurfi að leita sjö til átta ár aftur í tímann til að finna sams konar mál.
Árið 2010 var Catalina Mikue Ncogo dæmd af Héraðsdómi Reykjaness í 15 mánaða fangelsi fyrir milligöngu um vændi, líkamsárás og brot gegn valdstjórninni en var sýknuð af ákæru fyrir mansal.
Hún var einnig dæmd í 2½ árs fangelsi í Héraðsdómi Reykjaness í byrjun desember 2009 fyrir hagnýtingu vændis og fíkniefnabrot en Hæstiréttur þyngdi þann dóm í 3½ ár. Dómurinn í júlí árið 2010 var hegningarauki við þann dóm.