Lögregla mun fara fram á áframhaldandi gæsluvarðhald yfir manninum sem grunaður er um að hafa stungið tvo albanska pilta, annan til ólífis, á Austurvelli aðfaranótt 3. desember. Núverandi varðhald yfir honum rennur út í dag.
Þetta staðfestir Margeir Sveinsson aðstoðaryfirlögregluþjónn í samtali við mbl.is. Farið verður fram á fjögurra vikna varðhald á grundvelli almannahagsmuna.
Maðurinn sem er í gæsluvarðhaldi er Íslendingur á þrítugsaldri. Klevis Sula lést af sárum sínum fyrir viku en hinn pilturinn var útskrifaður af spítala fljótlega eftir árásina. Klevis ætlaði að ætlaði rétta árásarmanninum hjálparhönd en var stunginn að tilefnislausu.
Margeir segir að rannsókn málsins gangi vel en lögregla hefur yfirheyrt tíu manns vegna þess. Hún hefur auk þess stuðst við myndefni úr eftirlitsmyndavélum til að reyna að átta sig á atburðarásinni.