Úrskurðaðir í þriggja vikna einangrun

Frá blaðamannafundi lögreglu og embætti tollstjóra þar sem greint var ...
Frá blaðamannafundi lögreglu og embætti tollstjóra þar sem greint var frá viðamikilli alþjóðlegri lögregluaðgerð sem fór að stórum hluta fram hér á landi. mbl.is/Eggert Jóhannesson

Mennirnir tveir sem hafa verið í gæslu­v­arðhaldi í tengsl­um við rann­sókn á um­fangs­miklu smygli og fram­leiðslu á fíkni­efn­um, fjár­svik og pen­ingaþvætti hér á landi hafa verið úrskurðaðir í áframhaldandi gæsluvarðhald til 12. janúar.

Lögreglan á höfuðborgarsvæðinu fer fram á framlengt gæsluvarðhald á grundvelli rannsóknarhagsmuna.  Mennirnir munu því verða áfram í einangrun. 

Þriðja mann­in­um, sem hand­tek­inn var í tengsl­um við málið, var sleppt síðastliðinn miðviku­dag.

Mennirnir, sem eru pólskir ríkisborgarar, voru handteknir í viðamiklum aðgerðum lögreglu- og tollyfirvalda fyrir tíu dögum. Rannsókn málsins teygir anga sína til bæði Póllands og Hollands og er unnin í samvinnu við þarlend lögregluyfirvöld, auk Europol og Eurojust.

Menn­irn­ir eru grunaðir um að hafa komið ólög­lega fengnu fé inn í rekst­ur fyr­ir­tækja á Íslandi. Rann­sókn máls­ins hófst árið 2014 í Póllandi en ís­lenska lög­regl­an kom inn í rann­sókn­ina haustið 2016.

Samkvæmt upplýsingum frá lögreglu miðar rannsókn málsins vel.

mbl.is