Fátt er meira talað um í kaffiheiminum nú en kaffið frá Búrma. Það hefur vakið óvænta athygli fyrir gæði og kom vel út í smökkun hjá helstu kaffisérfræðingum heims. Þetta þætti varla tíðindum sæta nema fyrir þær sakir að eftir að kaffibændur fengu aðstoð við að bæta ræktunina í tengslum við þróunarverkefnið USAID sem hófst árið 2013 hafa orðið stórstígar framfarir á örskömmum tíma.
Aðalheiður Héðinsdóttir, eigandi Kaffitárs, fór í ævintýralega ferð í Shan- og Mandalay-hérað sem nær yfir mið- og suðurhluta Búrma í mars að kynna sér kaffiræktun, hitta bændur og kaupa af þeim kaffi, milliliðalaust. Kaffiráðgjafafyrirtæki bauð henni ásamt nokkrum öðrum til Búrma og var eiginmaður hennar einnig með í för.
Búrma er stærsta ríki á meginlandi Suðaustur-Asíu. Þau hjónin ferðuðust langt frá átakasvæðum í landinu eða Rakín-héraði þar sem rohingja-múslimar hafa sætt ofsóknum af hálfu búrmíska hersins og fleiri þúsund manns hafa verið myrt. Yfir sex hundruð þúsund rohingjar hafa flúið yfir landamærin til Bangladess og lýsa morðum, nauðgunum og ofbeldi sem þeir hafa orðið fyrir. Aung San Suu Kyi, leiðtogi Búrma og handhafi friðarverðlauna Nóbels, hefur sætt mikilli gagnrýni fyrir að stöðva ekki aðgerðir stjórnarhersins.
„Þetta virkaði sem friðsælt samfélag og mikil virðing borin fyrir konum og fjölskyldum. En því miður er herinn enn við völd að hluta,“ segir Aðalheiður. Hún segir að þrátt fyrir að þau hafi verið fjarri átökunum voru íbúar Búrma ekki sérstaklega ræðnir við Vesturlandabúa um aðför hersins gegn rohingjum. „Okkur fannst þau vera aðeins að afsaka Aung San Suu Kyi. Þau segja hana ekki ráða yfir hernum,“ segir Aðalheiður.
Íbúar Búrma sögðu jafnframt stöðuna viðkvæma og telja að Suu Kyi verði að velja gaumgæfilega baráttuna sem hún fer í og virðist hún ekki standa með rohingjum. Þeim finnst múslimar ekki vera hluti af þjóðinni heldur annars flokks þjóð en flestir eru búddatrúar.
„Það sem ég hef lært á að því að þvælast um í þróunarlöndum í 20- 30 ár að menning og samfélög hafa önnur gildi og oftast framandi okkur, einnig verður maður verður að setja sig í spor fólksins í landinu,“ segir Aðalheiður en ítrekar að hún fordæmir morðin og útskúfunina sem rohingjar sæta.
Hún hefur ferðast víða um heim, einkum til Suður-Ameríku, til að hitta bændur og kaupa af þeim kaffi. Frá fyrstu ferðalögum sínum til þróunarlanda hafi margt breyst til batnaðar. Sveitabæir hafi orðið tæknivæddari, rafmagn verið leitt inn á bæina, vatn hreinsað svo fátt eitt sé nefnt. „Fyrir 30 árum var það víða viðtekin venja að börn unnu á ökrunum með foreldrum sínum, þarna voru ekki skólar og börn unnu með foreldrum sínum eins og var hér á landi til sveita. Nú eru víðast hvar leikskólar og skólar sem börnin ganga í á meðan foreldrarnir vinna,“ segir Aðalheiður.
Hún nefnir sem dæmi að búgarður bóndans í Nígaragva sem hún kaupir alltaf kaffið sitt af sé ekki sá sami og þegar hún kom fyrst fyrir 22 árum. „Allur aðbúnaður er orðinn betri. Við megum alls ekki meta fólk og samfélög með okkar gleraugum. Reynum að skilja og við sem erum í viðskiptum getum bent á hvað það er sem skiptir okkur og okkar viðskiptavini máli,“ segir Aðalheiður og bendir á að á sama tíma sé þetta öfugsnúið því Vesturlandabúar vilja ekki borga mörgum sinnum hærra verð fyrir kaffið sem þeir kaupa úti í búð sem væri raunin ef sömu lífsgæði væru í þróunarlöndum og hjá okkur.
Kaffi hefur verið ræktað í Búrma í 100 ár á sléttum í um 1.400 metrum yfir sjávarmáli. Kaffið er ræktað á einfaldan og náttúrulegan hátt, hvorki vélar né áburður er notað. Berin eru handtínd af trjánum og baunirnar inni í berinu eru þurrkaðar strax á sérstökum þurrkgrindum. Áður en USAID fór að vinna með bændunum og leggja áherslu á kaffiræktun var engin áhersla á gæði. Berin voru seld óflokkuð til frekari úrvinnslu til Kína og bændur fengu lítið fyrir vöruna. Þess má geta að bændur á þessu svæði drekka ekki kaffi en drekka þeim mun meira te.
„Mér fannst svo magnað að sjá hvað er hægt að gera mikið til að bæta gæðin án mikils tilkostnaðar og meiri ágóði rennur beint til bændanna sjálfra í stað milliliðar,“ segir Aðalheiður. Bændunum var kennt að tína bara rauðu berin en ekki grænu af trénu. Á þurrkgrindunum er kaffinu snúið eins og heyi. Áhersla er lögð á að hver og ein fjölskylda kemur með sín ber og fjöldi kílóa er skráður niður, en fer ekki í eina hít. Hærra verð fæst fyrir kaffið ef það er gott sem skilaði sér beint til bóndans. Með þessum hætti er hægt að kaupa kaffi beint af bónda.
Ótal tækifæri liggja í Búrma og enn er margt sem hægt er að bæta, til dæmis hefur bændum ekki enn verið kennt að klippa til kaffitrén til að fá meiri uppskeru svo dæmi séu tekin. Þegar verkefninu var fyrst hleypt af stokkunum voru örfá samfélög bænda með í verkefninu en í ár voru þau helmingi fleiri því það spurðist hratt út hversu vel það gekk og á hvaða verði kaffið seldist.
Íbúar í Búrma eru ákaflega gestrisnir og fengu þau höfðinglegar móttökur hvert sem þau fóru. Heimili fólks eru snyrtileg og alls staðar eru plastdúkar á gólfinu og fólk situr á hækjum sér við lág borð. Aðalheiður viðurkennir að þau hafi oft orðið stirð á að sitja lengi í slíkri stöðu.
„Fólkið er forvitið að vita hvað þér finnst um kaffið því fólkið drekkur það ekki. Hálft í hvoru trúir það því ekki að það sé gott. Það var virkilega gaman að tala beint við fólkið sem hafði sjálft tínt berin. Ég segi alltaf við alla bændur sem ég hitti að þeir eigi að drekka kaffið sitt svo þeir viti hvað þeir eru með höndunum,“ segir Aðalheiður en ekki fylgir sögunni hvort bændurnir hafi farið að ráðum hennar.
„Fólkið var alveg yndislegt, þau bjuggu yfir stóískri ró en eru alls ekki undirgefin eins og maður sér stundum í Mið-Ameríku. Þau eru langt frá því að vera ágeng eins og Kínverjar eru stundum. Þetta er stolt fólk og vel klætt í hreinum og fallegum fötum. Þarna ganga allir um í pilsum, bæði karlar og konur. Það fara allir alltaf úr skónum á heimilunum,“ segir Aðalheiður.
„Til að landið geti orðið samkeppnishæft þarf að styrkja innviðina. Á næstunni verður reynt að setja upp kaffivinnslustöðvar nær sveitunum og þá þarf ekki að flytja kaffið um langan veg sem þýðir lægri framleiðslukostnað fyrir bændur og þar af leiðandi verður meira eftir hjá bændunum. Kaffið er komið á kortið og bændur í Búrma gæti eins og önnur lönd lifað af kaffirækt,“ segir Aðalheiður. Eftir heimsóknina keypti hún einn gám af kaffi sem endist eitthvað fram á næsta ár.
Hátíðakaffið frá Kaffitári þetta árið er frá Búrma og 100 krónur af hverjum pakka renna til hjálpastarfs Rauða krossins og aðstoð til rohingja. Spurð hvort hún hyggist kaupa annan gám veltur það á viðtökum Íslendinga. Sjálf vildi hún glöð geta keypt gott kaffi milliliðalaust frá Búrma svo bændur fengju stærri skerf í sinn hlut.