Ekki talin hætta á faraldri hér

„Við munum ekki sjá faraldra hér, nema eitthvað sérstakt gerist, en við megum alveg búast við að hér komi áfram upp stök tilfelli, á meðan svona mikið er um mislinga í Evrópu og heiminum öllum.“

Þetta segir Þórólfur Guðnason, sóttvarnalæknir hjá embætti Landlæknis í Morgunblaðinu í dag. Mislingafaraldur geisar nú í Gautaborg í Svíþjóð.

Tólf einstaklingar hafa smitast í faraldrinum en hann er mesti mislingafaraldur sem upp hefur komið í Svíþjóð í mörg ár. Hans varð fyrst vart í byrjun desembermánaðar eftir að óbólusettur einstaklingur leitaði til heilbrigðisstofnunar. Hann reyndist smitaður af mislingum. Athuganir hafa sýnt að allmargir hafa smitast, þar á meðal starfsmaður á Sahlgrenska sjúkrahúsinu. Þar hefur verið beitt einangrun og gripið til ýmissa ráðstafana til að hindra útbreiðslu smitsins.