Ungur karlmaður lést í umferðarslysinu sem varð á Suðurlandsvegi í morgun, á móts við Bitru í Flóahreppi í Árnessýslu, eftir árekstur tveggja fólksbíla. Þetta kemur fram í tilkynningu frá lögreglunni á Suðurlandi.
Ekki er hægt að skýra frá nafni mannsins að svo stöddu.
Einn var í hvorum bíl, báðir búsettir á Íslandi. Ökumaður hins bílsins er ekki alvarlega slasaður.
Slysið, sem varð um klukkan 7.40 í morgun, er til rannsóknar hjá rannsóknardeild lögreglunnar á Suðurlandi.
Að sögn Sveins Kristjáns Rúnarssonar hjá lögreglunni á Suðurlandi komu fólksbílarnir tveir úr gagnstæðum áttum. Mögulegt er að annar ökumaðurinn hafi misst stjórn á bílnum en fljúgandi hálka var á veginum og svartamyrkur.
Suðurlandsvegur var lokaður á meðan lögreglan og slökkvilið var að störfum á vettvangi en hann hefur verið opnaður aftur.