Búast má við miklu vonskuveðri og stórhríð á Norðvesturlandi og Ströndum um tíma fram undir hádegi í dag. Gul viðvörun er í gildi fyrir höfuðborgarsvæðið, Suðurland, Faxaflóa, Breiðafjörð, Vestfirði, Strandir, Norðurland vestra og Norðurland eystra.
Mjög hvöss suðvestanátt verður með éljum og það kólnar. Þá gæti slegið í storm af og til með mjög takmörkuðu skyggni að því er fram kemur í spá Veðurstofunnar. Þannig geta orðið mjög dimm él með litlu skyggni og færð gæti spillst, einkum í efri byggðum og á fjallvegum.
Það léttir þó til á Norðaustur- og Austurlandi.
Í fyrramálið snýst síðan í norðvestanátt, fyrst á Vestfjörðum, en hægari suðlæg eða breytileg átt framan af degi.
Síðan er að sjá að norðlægar áttir með snjókomu á köflum eða éljum ráði ríkjum nyrðra út vikuna, en yfirleitt þurrt sunnan til á landinu. Frost um mestallt land.
Öxnadalsheiði er lokuð og snjóþekja eða krapi er á velflestum vegum á Suður- og Suðvesturlandi og víðast hvar ofankoma. Ófært er einnig á Mosfellsheiði og Lyngdalsheiði en mokstur er hafinn. Einnig er ófært á Kjósarskarði og Krýsuvíkurvegi.
Verið er að hreinsa vegi á Vesturlandi en þar er allvíða þæfingsfærð eftir úrkomu næturinnar.
Á sunnanverðum Vestfjörðum eru fjallvegir ófærir og eins Þröskuldar - og mokstur í biðstöðu vegna veðurs.
Hríðarveður er á Norðurlandi, allt austur í Þingeyjarsýslur og víðast snjóþekja eða hálka. Það er mjög hvasst og hviðótt milli Sauðárkróks og Varmahlíðar en ekki síður á Siglufjarðarvegi og í Ólafsfjarðarmúla. Öxnadalsheiði er lokuð.
Það er hálka yfir Mývatns- og Möðrudalsöræfi en mikið er autt á Asturlandi. Þar er þó sums staðar farið að élja. Hálka er á Fjarðarheiði.
Með suðausturströndinni er autt suður í Öræfi en hálkublettir eða hálka þar fyrir vestan.