Forstjóri Landspítalans, Páll Matthíasson, segir að spítalinn hafi aldrei verið öflugri en nú og rangt sé að hann ætli að draga úr starfsemi líkt og fram hafi komið í fréttum.
„Landspítali er oft og iðulega í kastljósi umræðunnar, eðli máls samkvæmt. Á degi hverjum birtast 10-12 fréttir sem tengjast starfsemi spítalans. Undanfarið hefur mikið álag á spítalanum vakið athygli og ekki að ósekju en iðulega er þetta afar annasamur tími hjá okkur.
Rekstur spítalans er sömuleiðis oft í deiglunni og ég hjó eftir þeim staðhæfingum í vikunni að vegna fyrirkomulags fjárveitinga til spítalans kjósi hann að draga úr starfsemi fremur en auka hana. Þetta er rangt. Þvert á móti höfum við aldrei tekið á móti fleiri sjúklingum, sem sífellt eru veikari, gert fleiri aðgerðir og veitt flóknari meðferðir og árangurinn okkar er svo sannarlega eftirtektarverður.
Landspítali hefur í raun aldrei verið öflugri enda starfar hér í framlínu hæfasta starfsfólkið við flókin störf. Enda þótt bæta megi rekstrarumhverfi spítalans verður ekki á móti því mælt að Landspítali spilar vel úr því fé sem til hans er veitt og hverri krónu sem til spítalans kemur er vel varið,“ segir í forstjórapistli frá því í gær.
Þar kemur einnig fram að spítalinn hafi ákveðið að flýta gerð samskiptasáttmála Landspítala. „Honum er ætlað að skýra hvernig við viljum að samskiptum okkar í millum sé háttað hér á spítalanum og hvernig við viljum ekki að þau séu. Þetta kann að hljóma einfalt verkefni og fljótafgreitt enda ætti kurteisi og tillitssemi í samskiptum að vera sjálfsögð.
„Niðurstöður örkönnunar um samskipti á spítalanum sem við gerðum í kjölfar #metoo-byltingarinnar benda þó til þess að ýmislegt geti betur farið í samskiptum innan spítalans.
Við höfum því hafið vinnuna og gerum ráð fyrir að þróun samskiptasáttmálans verði 3-4 mánaða verkefni sem allt starfsfólk er eindregið hvatt til að taka þátt í.
Um er að ræða 50 funda syrpu sem framkvæmdastjórar spítalans munu leiða. Á fundunum verður meðal annars safnað saman sögum starfsfólks af atvikum og ábendingum um úrbætur haldið til haga. Í kjölfarið verður unnið úr efni fundanna með skipulögðum hætti og inntak sáttmálans mótað,“ segir í pistli forstjóra Landspítalans.